أبوي بحب مشوار الخضرجي
واللحام الي جنبه
أمي بتجهز التتبيلة، عشان نعطيها للحام
بس اللحام نزل مستواه، وصار الخضرجي بعيد علينا وانقطع رزقه معه بدون ذنب
صحيني قبل ما تروح على الخضرجي يابا
أمي بتحب مشوار المخبز
وأنا وياها مناكل الخبز بالسيارة، وهو لسا سخن
مع أمي أي مشوار ممكن ينتهي بلقمة بالسيارة
رايحين ع الدكتور؟ يلا ريم مش بعيد
بدك شي من الصويفية؟ مش غلط انجيب منقوشة من أبو خميس
بحب مشوار البلد مع أبوي
بقلي كيف كان ياخد السرفيس من الحسين لهون، يدرس في المكتبة
عالم بعيد عني، بس كنافة من هون وكتاب من هناك والمسافة بين عالمي وعالمه تتقلص
مشاوير كنت أهرب منها وأنا صغير
اليوم بستناها لما تيجي مرة بالسنة
